Аудан бойынша орналасқан киелі жерлерінің бірі :Малыбай көлі халықта түрлі аңыздарға ие тарихи табиғи көл.
Малыбай - айдың-шалқар көлдің аты,
Малыбай - құтты қоныс, жердің аты,
Малыбай - ағайынға өкпелі боп,
Елінен саяқ кеткен ердің аты.
Ертеректе Малыбай деген батыр керейдің бір ауылын бастап келе жатып, шөбі шүйгін, мал өсіруге өте қолайлы осы бір өңірге қостарын тігіп, қоныс тебеді. Малға да, жанға да қаншама жайлы болғанмен, ауыз су тапшылығы байқалады. Содан Малыбай батыр үлкен ойпаттың қақ ортасынан ойып құдық қаздырады. Қаншама тереңдетіп казғанмен су шықпай әуреге түсіреді. Сонда Малыбай батыр биік өскен тіп-тік қарағайды кестіріп, бір басын үшкірлеп, құдықтың түбіне бойлата қақтырады. Қағылған қарағайды қаншама адам жабылып, қайыра суырып ала алмай әуре-сарсаңға түседі. Міне, сол кезде Малыбай батыр терең қазылған құдыққа өзі түсіп, қарағайды ырғап-ырғап жұлып алғанда жер астынан аспанға су жайылып, үлкен ойпатқа толып, көлге айналады. Осыған байланысты көлдің аты Малыбай атанған екен.
